1. ANG NAGWALANG BABAE AT BLADE....Sa isang bahagi ng Quiapo na may mga beerhouse, napadaan ako papunta sa hintayan ng mga jeep papuntang Baclaran....6AM...inumaga sa inuman. May napansin akong parang pinagkakaguluhan, yon pala, may babaeng lasing na nagwawala, may hawak na blade at gustong maghiwa ng pulso. Sa hindi malayo ay may lalaking nakayuko...boyfriend pala niya pero nabistong may asawa. Walang magawa ang intsik na may-ari ng restaurant na pinagtatrabahuhan ng babae bilang waitress kundi tumingin lang. May nakita akong pulis sa di kalayuan at nang sabihan ko ng problema, sabi niya, "AYAW PAAWAT, EH...BAKA KUNG LAPITAN, TULUYANG MAGLASLAS NG PULSO." Balik ako sa eksena...napansin kong tila Bisaya ang babae, Cebuana dahil sa punto niya sa pagsalita kaya naglakas-loob akong kausapin siya sa Bisaya. Tinanong ko siya kung ano ang problema talaga at doon na rumetekada ang bunganga sa salitang Bisaya...,.nagsumbong sa akin habang umiiyak. Nakakita ako ng pagkakataon dahil tila nagtiwala kaya kaswal akong lumapit habang kausap siya...nang tumigil sa pagsalita habang umiiyak pero nakatingin sa akin ay niyakap ko...hindi ko hinawakan ang kamay na may blade pero naramdaman kong nasa likod ko. Binulungan ko siya ng mga payo at sinabihang ibigay ang blade sa akin, ibinigay naman. Tinanong ko siya kung saan ang sinasabi niyang boyfriend niya....nang maituro ay minura ko ng todo ang lalaki habang kinikindatan. Inutusan kong kausapin ang babaeng wala nang blade at yayain sa loob ng restaurant upang mag-usap sila, sumunod naman ang dalawa...sabi ko sa intsik na may-ari ng restaurant, sa kusina sila mag-usap. Ilang minuto pa ay sumunod ako at nagtanong kung okey na sila, pero payo ko pa rin ay HUWAG NA SILANG MAGKITA. Inutusan ko ang lalaking humingi ng sorry sa babae at ginawa naman. Hindi kumikibo ang babae habang kausap ng lalalit, at nang malaman kung ang pera palang "hiniram" daw ng lalaki ay pamasahe sana niya sa pag-uwi sa Dumaguete ay sinabihan kong gagawan ng paraan upang makahanap uli at pinangakuang babalikan ko agad siya, kaya mag-empake na....ang intisk sinabihan kong bigyan ng pera ang waitress niya at nagbigay naman ng Php1k. Pinilit kong isama ako ng lalaki sa tinitirhan niyang nasa tabi pala ng isang estero sa Binondo....may sakit ang asawa at dalawa ang anak, ang panganay ay binatilyo na. Sinabi niyang ginamit niya ang pera ng waitress para sa gamot ng misis. Sinabi kong huwag nang manloko ng babae at dahil may kaibigan akong may maliit na hardware sa Binondo rin, nakiusap akong bigyan ng trabaho kahit maliit ang suweldo...naging taga-alsa ng mabibigat na binibili mula sa bodega at nagtinda rin ng sigarilyo sa labas ng tindahang pinabantayan sa panganay na anak.

Ang waitress ay binalikan ko para sunduin at ihatid sa tiyahin niyang nakatira sa Baseco compound para hindi mahirapan kung sumakay na papuntang Cebu muna at magpi-ferry pauwi ng Dumagute....bago magtanghali, missions accomplished na, kahit may kaunting hang-over pa dahil galing ako sa inuman nang nakaraan gabi....BUTI NA LANG BUHAY PA, HINDI NALASLAS NG BLADE!

2. ANG KAIBIGAN KONG KINUKUTUNGAN....Sa CM Recto Extension, Divisoria ay may tinatawag noong BURAUTAN dating riles kung saan ay naglalatag ng mga panindang napulot sa basura at mga gamit na second hand, pati mga tumpok na gulay na galing sa pinagtapunan ng mga reject. Marami akong kaibigang nagtitinda, mga nakatira sa Baseco Compound at Isla Puting Bato, Tondo. Ang grupo naming "Gang of Four" ay may mga tinutulungan sa pamamagitan ng pagbigay ng puhunan at ang dalawa sa kanila ay nagsumbong sa aking may nangongotong daw sa kanila, sabay turo sa akin sa apat na kilala ko sa mukhang mga istambay sa lugar, nakakausap ko pa kung minsan. Ang pagkaalam nila ay "buyer" ako. Nilapitan ko sila at diretsahang tinanong ng, "...nanghihingi daw kayo ng pera sa mga nagbuburaot?"...sagot sa akin, "...hindi, ah...nanghihiram lang kami...". Hindi na ako nagtanong pa. Kinabukasan, isinama ko ang kaibigan kong hepe ng substation ng mga pulis sa Binondo na sinabihan ko na ng sitwasyon. May substation din sa lugar na malapit sa pinaglalatagan ng mga panindang buraot, at kaibigan niya ang hepe kaya dinaanan namin. Nang kuwentuhan namin, galit na galit dahil may nagsasabi na sa kanyang involved daw ang dalawa niyang tauhan. Pinatawag ang mga istambay na nangongotong at pinaturo kung sino sa mga pulis niya ang nagbibigay proteksiyon sa kanila...ipinakita ang mga larawan ng mga pulis at tinumbok ng mga nangongotong ang dalawa....YON LANG...HINDI NA NAGPAKITA ANG MGA NANGONGOTONG SA BURAUTAN...BINANTAAN NG HEPE NG SUBSTATION. Ilang araw ang nakalipas, nakita ko ang isang nangongotong kumakain ng lugaw sa bangketa ng Recto, humingi ng pasensiya at noon ko sinabihang, concern ako sa mga kinukotongan nila dahil ang perang puhunan ng mga nagtitinda ay tulong lang din ng grupo namin. Wala siyang permanenteng trabaho kaya binigyan ng grupo namin ng maliit na puhunan...ilang araw pa ay nakita ko siya uli sa ARRANQUE, namimili ng mga sirang alahas na silver...at ang iba daw sabi niya ay BAKA GALING SA "SNATCH".....BUTI HINDI NAGTANIM NG GALIT SA AKIN ANG MGA MANGONGOTONG AT BAKA HINDI AKO NAKABALIK SA DIVISORIA AT TONDO....HINDI KO NA ITINANONG KUNG NASAAN ANG TATLO NIYANG KASAMA.