Mga Adventure Ko sa Manila

Bilang Bagong Saltang Promdi (1976)

Ni Apolinario Villalobos

Nang una akong tumapak sa Manila ay nang dumating ako galing sa Davao kasama ang iba pang mga aplikante na magti-training sa PAL. Escort namin ang namayapa nang si Bud Aseoche. Kasama ko sa grupo sina Abet Yu, Boy Asistido, Rey Porras, at Fred Derequito. Hilong-hilo ako paglapag ng eroplano sa airport – culture shock! Dinala kami ni Mang Asyong (Ace Cabrera) sa boarding house sa Baclaran, malapit sa Airport Road na namumutiktik ng mga beer house….nasilaw at napanganga ako sa liwanag at patay-sinding mga ilaw.

Habang nagti-training kami, dahil tinipid ko ang training allowance, naglalakad ako hanggang sa Gate 1 ng Nichols kung nasaan ang training center. Pinilit ko ring hindi mamasyal tuwing weekend na walang pasok sa training center. Isang weekend, dahil sa tindi ng hatak ng adventure, sinubukan kong lumabas ng boarding house at sumakay sa DM Transit. Namangha ako dahil noon pa lang ako nakakita ng “konduktor” ng bus na babae. Animo karton sa pagkatigas ang uniporme dahil sa almirol. Panay lang ang tingin ko sa labas ng  bintana – window tripping. Nang lumapit ang konduktora, nagbayad ako at binigyan niya ako ng tiket. Ilang beses pa siyang lumapit…panay din ang bayad ko! Yon pala, ang paglapit niya ay para lang makita ang tiket ko kaya nakalahad ang kamay niya, subali’t dahil di ko alam, hindi ko pinapakita ang tiket, at bayad lang ako ng bayad, tanggap naman siya ng tanggap!...pero walang tiket!

Narinig ko sa kwento ng mga naunang boarders ang Avenida na maganda raw. Sinubukan ko ring puntahan. Sumakay ako sa jeep at bumaba sa tapat ng Sta. Cruz Chruch. Sa kalalakad ko, nakarating ako sa Ongpin St. na bahagi na pala ng Chinatown. Namangha uli ako. May nakahalata yatang manggagantso, nilapitan ako sabay pakita ng isang retrato – maganda ang babae, tsinita. Tanong niya kung type ko raw, sagot ko, “okey lang”. Iba pala ang gusto niyang mangyari…sex trip sa halagang sinabi niya.

Tumanggi ako sa alok niya pero sa kapipilit niya at curiosity ko na rin, sumama ako. Malayo ang nilakad namin hanggang makarating sa Trinidad St., na kahanay pa rin Avenida pero malayo na sa sentro. May pinasok kaming maliit na “apartment” at sabi ng bugaw, magpahinga daw muna ako sa kwarto, sabay turo ng pinto. Dahil napagod ako, tumuloy na ako at humiga sa kama, pero hindi ko binuksan ang ilaw. Maya-maya pa may pumasok, malakas ang amoy ng pabango, lumapit at minasa-masahe ako. Bandang huli, pumayag ako sa sandaling masahe sa maliit na halaga. Pilit niyang sinasabit ang pantalon ko sa isang bahagi ng dingding pero hindi ako pumayag at sa halip ay itinabi ko sa unan. Nang umabot sa puntong may nasalat ako sa bandang “ibaba” niya…patunay na hindi pala siya tunay na babae, nagalit ako at nasipa ko siya. Bumalandara siya sa dingding at sabay noon, may nabuksang butas na ang takip ay umiikot pala! Doon niya gustong isabit ang pantaloon ko na kung natuloy ay nadukot ang laman ng bulsa ng taong nasa kabilang kuwarto lang! Nataranta din ang “babae” at tumakbong palabas ng kwarto, ni hindi ko nakita ang mukha dahil madilim sa kwarto.

Nagmura ako habang nagsusuot ng pantalon, t-shirt, at sapatos. Ang brief at medyas ibinulsa ko na lang dahil hahabulin ko nga ang “kaguwang”.  Hinanap ko rin ang bugaw na tumakbo palang palabas .

Susundan ko sana subali’t  pagdating sa kanto nakita kong may apat na siyang kasama, kaya ako naman ang nagmadaling umalis at pumunta agad sa bus stop sa Avenida. Nang may dumaan, sakay agad ako nang hindi man lang nagtanong kung saan papunta ang bus. Nakahalata yata ang konduktor na bagong salta ako kaya siya na ang nagbanggit ng mga lugar na pwedeng babaan. Pinili ko ang Luneta kung saan nga ako bumaba. Habang naglalakad ako ay tinitingnan ako ng mga tao. Dahil sa naghalong niyerbiyos at pagod, bumili ako ng softdrink sa isang kiosk… tinitingnan pa rin ako ng mga tao. Naawa yata ang tinder kaya sinabihan akong, “sir, baligtad ho ang t-shirt nyo…”. Noon  ko pa lang naalala na hindi ko rin naisuot ang medyas at brief ko. Sa comfort room ng kiosk na yon ako naghubad ng pantaloon upang maisuot ang brief. Ang medyas ay nasa bulsa ko pa rin. Nagpasalamat ako sa pangyayari dahil narating ko ang Luneta for the first time kahit nanginginig pa rin ako sa magkahalong inis at nerbiyos pagdating ko sa boarding house.

Hindi pa rin ako nadala. Quiapo naman ang sunod kong pinuntahan. Madaling puntahan dahil sa landmark na malaking simbahang Katoliko. Habang naglalakad ako, may lumapit sa aking may dalang nakarolyo….pabulong na sinabing bold magazines daw. Buy one take one daw at nakabalot na. Mura kaya binili ko subali’t nang bubuksan ko para tingnan, sabi ng nagbenta ay sa bahay ko na lang daw buksan at baka mahuli kami ng pulis, bawal kasi. Sa boarding house, nang buksan ko, para akong pinagsakluban ng langit dahil ang nakabalot pala ay dalawang issue ng Liwayway. Akala ko ay Playboy man lang o Penthouse para maipagyabang sa mga kasama ko.

Dahil sa mga adventure na yon, nabawasan ang pinakaiingatan at tinitipid kong allowance. Pero okey lang. Inisip ko na lang na para akong nagbayad sa isang tour guide na balasubas.