Showing posts with label Moro Islamic Liberation Front. Show all posts

Mamasapano

Ni Apolinario Villalobos

Palanas na nadilig ng dugo ng kabayanihan

Dugong umagos mula sa mga ugat ng apatnapu’t apat na SAF

Mga piling-piling pulis na walang dudang matatapang, makabayan

Sa sinumpaang adhikai’y hindi umurong, at animo bakal ang katapatan.

Sa liblib na Tokanalipao ng nasabing bayan

Mga teroristang sina Usman at Marwan, sa kadilima’y tinunton-

Kadilimang pinatindi ng mga paing bomba na ibinaon sa kapaligiran

Subali’t hindi inalintana ng apatnapu’t apat, may tatak ng kabayanihan.

Mga mapalad na nabuhay, puso’y nagngitngit

Bakit wala man lang umalalay sa kanilang nasukol, naghihingalo

May mga armas nga sila, subali’t ibang granada’y hindi nagsisabugan

Kaya pagkadismaya’y nadagdag sa nagngangalit na kanilang naramdaman!

Amerika’y  itinuturong may pakana nitong lahat

Maraming pangyayari ang magpapatunay daw, lahat ito’y totoo

May pinalipad pa daw na “drone” kung saan nagkaroon ng bakbakan

Subali’t sa kabila ng mga nangyari ay walang tulong na kanilang inasahan!

Ang presidente ng Pilipinas na tawag nila ay Pnoy

Nasa Zamboanga, umaming umaga pa lang, lahat ay alam na niya

Mga heneral niya, nakapaligid sa kanya, pati si Roxas, kalihim ng DILG -

Ni isa ay hindi nagkibuan kung sino sa kanila ang sa presidente ay nagsabi!

Akala ni Pnoy, tropeo na ang matatanggap niya

Akala, dahil Amerika ang sa lahat ay nagpakana, sa SAF ay nagtulak

Natigalgal siya dahil napatay man si Marwan, kung napatay man talaga

Ngitngit ng bayan ang naging kapalit, na kahit ano ay di kayang magpahupa!

Malaking batik sa kasaysayan ang Mamasapano

Kahihiyan ng isang presidenteng nagmamagaling, kung tawagi’y Pnoy

Dinamay niya ang “dangal” sa pangalang nakadikit sa kanyang pagkatao

Bangunot sa kanya na hindi magpapatahimik kaya tuluy-tuloy ang pagtatago!

Dahil sa Mamasapano, nagkaroon ng katanungan-

Nararapat bang sa MILF ay magbigay ng tiwala sa itatatag na Bangsamoro?

Sila na ba ang kahuli-hulihang grupo na dapat kausapin ng ating pamahalaan –

Upang sa Mindanao ay magkaroon ng inaasam… habang-buhay na kapayapaan?

(The 44 commandos of Special Action Force (SAF) of the Philippine National Police (PNP) were massacred at Tokanalipao, Mamasapano in Maguindanao, on the island of Mindanao, on 28 January, 2015 when they tried to serve the warrant of arrest to two international terrorists, Marwan and Usman who were entrenched in the Moro Islamic Liberation Front (MILF) territory. Purportedly, the USA has a hand in the operation which also points to the president of the Philippines, Noynoy Aquino and suspended PNP Chief Allan Purisima as the ones directly responsible for everything. This has yet, to be proven with the so many investigations going on which many Filipinos believe, will lead to nowhere, as usual.

Meanwhile, Filipinos are now doubtful if MILF can be trusted with the authority to be given them for the creation of a self-governing region, the Bangsamoro, as the group’s leadership is now viewed with incompetence and having a continued cordial relationship with their supposedly breakaway group, the Bangsamoro Islamic Freedom Fighters (BIFF). Prior to the creation of the Bangsamoro, the Bangsamoro Basic Law (BBL) will have yet, to be passed by the Philippine Congress and Senate….and, that is now the primary concern, if the lawmaker will pass it, in view of the massacre of the 44 SAF commandos at Mamasapano.)

Naunsiyaming “Pamana” sana

…sumabog na parang bomba sa mukha!

Ni Apolinario Villalobos

Abut-abot ang gabậ ng presidente. Sa mata ng mga Pilipino ay wala siyang ginawang tama mula pa noong unang araw na pag-upo niya….puro wakal siya….puro dada ng mga talumpating puno ng mga salitang mabalarila. At, dahil pababa na siya sa puwesto, animo ay nag-aapurang magkaroon ng ipapamana niya sa sambayanan. Ang inakala niyang pag-asa na magpapabango ng pangalan niya pati sa mga kaibigan niyang Amerikano ay ang pagkahuli sana ng mga teroristang internasyonal na nagtuturo pa ng paggawa ng bomba na ang ginawang balwarte ay Pilipinas – sa Mindanao. Dahil sa Mamasapano massacre, siya ito ngayon ang parang nasabugan ng bomba sa mukha kaya hanggang ngayon ay walang masabi, tulala pa rin – animo ay asong bahag ang buntot na nakasiksik sa sulok. Kahit hindi pa kasi tapos ang imbestigasyon, malalakas ang mga insidenteng nagtuturo sa kanya bilang promotor ng lahat.

Hindi makakalimutan ng mga Pilipino ang hindi niya pagsalubong sa mga bangkay ng mga bayaning SAF44 na ang ipinalit niya dahil sa pananaw niya ay higit na mahalaga ay ang pagdalo sa pasinaya ng isang pagawaan ng sasakyan. Hindi rin makakalimutan ang pagdating niya ng late sa necrological service para sa mga namatay. Talagang para sa kanya ang mga namatay sa Mamasapano ay walang halaga!

Tulad ni Gloria Arroyo, gumagamit din siya ng mga heneral upang maging panakip-butas…upang hindi umalingasaw ang baho ng bulilyasong nangyari. Ang aga niyang pumuwesto sa Zamboanga, malapit sa pinangyarihan ng massacre sa pag-aakalang “in the bag” na ang mga target na terorista. Sana, sana, sana…kung walang bulilyaso, ilang minuto lang ay puwede siyang lumipad sa Gensan, subalit ang nangyari, daliri ni Marwan ang dinala doon upang i-turn over sa FBI!

Habang kampante sa eroplanong sinakyan pabalik sa Maynila, sa Mamasapano ay naiwan ang mga bangkay ng mga SAF commandos at mga sibilyan na nadamay. Namatay nga ang isa sa mga target na terorista, si Marwan, nakatakas naman si Usman, at ang kapalit ng lahat ay buhay ng 44 na SAF commandos, pagkasugat ng marami pa nilang kasamahan, kamatayan din ng mga sibilyan sa Mamasapano na nadamay sa bakbakan, at pagkasira ng mga pananim na pangkabuhayan ng mga kawawang magsasaka na ngayon ay nakanganga sa nakaambang gutom.

Sa pinakahuling balita, ang pinangakong tulong ng gobyerno sa mga namatayang pamilya ng mga bayaning SAF44 commandos ay hindi pa dumadating. Sinabi ng isang kapamilya ng namatay na ang tanging natatanggap nilang tulong ay galing sa mga naawang nakiramay na mga tao.

Sa pagbaba ni Noynoy Aquino, hindi lang niya babaunin ang mga pagbatikos ng taong bayan, kundi pati na rin ang didikit na parang pagkit sa pagkatao niyang pantukoy na siya ang sumira sa pangalan ng kanilang angkan….at habang buhay na maitatala  ang mga ito sa kasaysayan ng Pilipinas!

Ang BBL ay Hindi Kailangang sa Panahon ni Pnoy Ipasa

…kung karapat-dapat mang ipasa

ni Apolinario Villalobos

Dahil nakitaan ng maraming butas ang mga nakasaad sa BBL, dapat lang na  busisiing mabuti ng mga mambabatas. Hindi kailangang ipasa agad dahil gusto ni Pnoy bago siya bumaba. Ang gusto niyang palabasin ay “pamana” niya ito sa mga Pilipino…sa Pilipinas. Nahihibang na yata siya! Dahil minadali ng mga “tagapayo” niya ang mga patakaran, nagkalitse-litse ang mga isinaad sa BBL, nabisto na maraming controlling provisions o mechanisms ang hindi nailagay. Pati ang inilagay na provision tungkol sa budget ng sinasabing rehiyon ay nabistong kwestiyonable. May mga kataga ring dapat hindi inilagay, tulad ng nabanggit ni senador Allan Cayetano na “colonizer”, “colonization”, na tumutukoy sa pamahalaan ng Pilipinas. Paanong naging “colonizer” ng Mindanao ang gobyerno?

Sa pagpatuloy ng usapin dapat palitan sina Deles at Ferrer ng maaayos na representante ng gobyerno, at may malawak na kaalaman tungkol sa Mindanao, lalo na ang mga bayang masasaklaw ng Bangsamoro. Hindi dapat na dahil abogada o abogado ay puwede na. Hindi dapat na dahil propesor ay pwede na. Dapat tutukan ang aspeto ng accountability ng mga namumuno sa BBL sa gobyerno ng Pilipinas dahil isa lang naman itong rehiyon, lalo pa at babadyetan din pala ng malaki ng central government. Ang isang aspeto pa ring dapat tutukan ay tungkol sa security at pagmintina ng Bangsamoro ng sarili nitong police at military forces, lalo na sa mga bagay na may kinalaman sa “chain of command”, kaya dapat ang kapulisan at kasundaluhan nito ay kontrolado pa rin ng Philippine National Police at Armed Forces of the Philippines.

Walang kwestiyon sa Bangsamoro bilang isang rehiyon, ang kinukwestiyon ay ang mga patakarang magpapatako nito at kakayahan ng mga taong gagawa ng desisyon para sa mga masasakop. Dapat tumigil na ang tumatayong nakikipaglaban para sa BBL sa kababanggit ng kasaysayan. Sa halip ay tumutok sila sa kasalukuyan at mga plano para sa kinabukasan ng mga masasakop ng Bangsamoro. Walang masama sa pangalang “Bangsamoro” na ibig sabihin ay “moro country”, kaya dapat huwag na nilang ilihis sa paggamit ng “tradition”, dahil babalik na naman sa kasaysayan.

Ang isang magandang paliwanag tungkol sa Bangsamoro ay sa transition period lamang daw mamumuno ang MILF, at pagdating ng itinakdang panahon ay magkakaroon na ng botohan at ang MILF ay magiging isang political entity na lamang. Magkakaroon din daw ng iba pang political entity at hindi isasaalang-alang kung ang mga mga miyembro ay Kristiyano o Muslim. At nang tanungin si Iqbal kung walang problema sa MILF, matalo man sa eleksiyon, sumagot siyang wala naman daw. Sana ang sagot na ito ay pangangatawan ng MILF.

Maganda ang samahan ng mga Kritiyano at Muslim sa mga bayang sasaklawin ng Bangsamoro. Katunayan, magkakatabi pa ang mga puwesto nila sa mga palengke. Hindi na limitado sa pagsasaka at pangingisda ng tilapia at dalag ang mga Muslim dahil karamihan sa kanila ay mga negosyante na rin. Ganoon din ang mga Kristiyanong karamihan dati ay nagtatanim lamang ng palay at mais, ngunit ngayon ay nagnenegosyo na rin. Nagtutulungan sila patungo sa asenso. Ang mga taong ito ang walang kamuwangan o alam kung ano ang ilalagay bilang mga probisyon sa mga batas ng Bangsamoro. Kaya ang pagtitiwala nila ay hindi dapat linlangin.

Ang nakakaalam ng lubos tungkol sa mga batas ng Bangsamoro ay mga opisyal na “nasa itaas”. Kaya kung may umabuso man sa paggawa at  pagpapatupad ng mga ito at umabot na naman sa gulo na ibibintang na naman sa relihiyon, tiyak…. ang dahilan ay  mga namumuno dahil sa kanilang kasakiman o kakulangan ng kaalaman sa pamumuno. At ang isa pang tiyak….mga kawawang nasasakop na mga tao na naman ang kawawa at magdudusa!

Ako ay taga-Mindanao…ipinanganak at lumaki sa Mindanao. Dapat ang mga Mindanaoan ay magkaisa, saang lupalop man sila ng bansa o mundo. At sa adhikaing ito, dapat isantabi ang pagkakaiba sa relihiyon. Dapat itanim sa isip na lahat ng Mindanaoan na sila ay Pilipino…at hindi Kristiyano, Muslim, Bisaya, Tagalog, Ilocano, Kapampangan, o kung ano pa man. Sa ganoong uri lamang ng pagkakaisa makakamit ang kapayapaan sa Mindanao. Kailangang magtulungan sa mapayapang paraan, hindi sa karahasan. Kung ang mga namumuno ay nagpapatihiwatig sa paggamit ng karahasan upang “makamit” ang kapayapaan, dapat sila ay pagdudahan kung bukal ba sa kanilang kalooban ang sinusulong nilang adhikain o hindi.

Hindi Dapat gawing isyu ang pagka-Moro

o pagka-Kristiyano ng isang Pilipino

…ang isyu ay dapat sa kanyang pagkakamali

Ni Apolinario Villalobos

Ang gulo sa Mindanao ay hindi dapat isentro sa relihiyon. Ang mga taong ipinanganak sa lahat ng dako ng Pilipinas ay Pilipino. Ang mga Pilipinong ito ay may kaibahan lamang sa paniniwala sa Diyos dahil may Katoliko, Muslim, Protestante, Buddhist, Taoist, etc. Subali’t kung ang pinag-uusapan ay tungkol sa adhikain lalo na kapayapaan, iisa lang dapat ang isinusulong ng lahat bilang iisang lahi. Magkaiba man sa mga salita at pananamit, iisa pa rin ang lahi – Pilipino.

Dapat tanggalin sa kaisipan natin ang agam-agam tungkol sa pagiging Ilokano, Bisaya, Maranao, Maguindanaoan, Tausug, Badjao, Kapampangan, Pangasinense, etc., ng isang Pilipino. Dahil dito, nagkaroon na ng batas na nagsasabing hindi dapat banggitin sa balita ano ang tribu o kinabibilangang rehiyon ng isang nahuling iniimbistigahan.

Sa usaping Mamasapano massacre, ang tinatalakay ay ang pagkakamali ng MILF, kakulangan ng PNP/SAF at militar ng bansa, kung meron man, na ang tinutumbok ay isang tao o mga taong dapat sisihin at papatawan ng karampatang kaparusahan. Hindi dapat gawing isyu ang pagka-Moro ng  MILF, dahil batay sa impormasyon, may mga Kristiyano din silang miyembro o di kaya ay mga converts mula sa Kristiyanismo. Hindi dapat balikan ng MILF ang kasaysayan ng Mindanao at sabihing nawalan ng lupain ang mga Muslim dahil sa pagdating ng mga taga-Luzon at Visayas. Dapat isipin ng pamunuan ng MILF na may mga bentahang nangyari sa pagitan ng mga datihang nakatira sa mga lupain at sa mga dumating galing sa ibang bahagi ng bansa.

Ang mga dinatnang nakatira sa Mindanao ay nasa ilalim ng mga datu, at kung hindi man umusad ang kabuhayan ng mga nasasakupan ng mga ito ay hindi dapat isisi sa mga dumating na mga kababayan galing sa ibang bahagi ng Pilipinas. Ang tanong dapat ay kung ginawa ba ng mga datu ang kanilang dapat gawin upang umasenso ang kanilang mga nasasakupan? Nirespeto ang mga datu pati ang mga dinatnang kaugalian sa pagpataw ng hustisya, pati na ang educational system na Madrasa.

Hindi na dapat ulit-ulitin ni Chairman Iqbal ang kasaysayan na ayon sa kanya, sakop din ng Moro pati ang Luzon. Nasa kasalukuyan na tayo at marami na ang nangyari kaya dapat iwasan na niya ang paninisi dahil lalabas na nanggagatong siya at magreresulta lamang ito sa gantihan na talagang walang katapusan. Bilang isa sa mga namumuno ng MILF, dapat ay “gumitna” siya lalo pa at sinasabi niyang ang Bangsamoro ay para sa LAHAT ng nakatira sa mga masasakop nito sa Mindanao…para sa kapayapaan pati na ng buong Pilipinas.

Ang presidente ng Pilipinas ay binabatikos pati na ang kanyang mga tauhan sa Malakanyang at mga kalihim. Ang mga mambabatas ay binabatikos dahil sa korapsyon. May mga gobernador at mayor na binabatikos. Lahat sila binabatikos subalit hindi binabanggit kung sila ay mga Bisaya o Tagalog o kung ano pa man. Binabatikos sila bilang mga Pilipino dahil sa sinasabing ginawa nilang mga pagkakamali. Walang pinag-iba ang mga pagbatikos na nabanggit sa pagbatikos sa pamunuan ng MILF dahil pinagduduhan ngayon ang kakayahan nila sa pamumuno ng Bangsamoro kung sakaling matuloy ito, kaya hindi nila dapat gawing isyu ang kanilang pagka-Moro. Ngayon pa lang ay dapat magpakita na ng “patas” na ugali ang mga namumuno ng MILF upang paniwalaan sila sa kanilang adhikain na pagkamit ng kapayapaan para sa LAHAT dahil maraming Kristiyano ang mapapasailalim sa rehiyong pinaglalaban nila.