Ang Busilak na Pag-iibigan

…nina Serf at Mei

(para kay Serf at Mei Bernardo)

Ni Apolinario Villalobos

Ang pag-iibigan ay nagsisimula

sa pagiging magkaibigan -

matalik ang samahan, walang iwanan

puno ng kasayahan, mayroon pang tuksuhan.

Umuusbong na parang halaman

nagkakaugat ng malalim –

mga daho’y yumayabong, dulot ay lilim

nagkakabulaklak, bubuyog dito’y sumisimsim.

‘Yan ang pag-iibigan nina Serf at Mei

sinubok ng mahabang panahon –

nahaluan ng mga tampuhang nakakalason

nguni’t di sila natinag, dahil parehong mahinahon.

Pag-iibigang busilak, pinaghirapang makamit

subalit dahil talagang nakatakda –

anumang agam-agam pati na pagdududa

ay nalusaw at napawi dahil sila’y para sa isa’t isa!