Si Hesukristo…

Ni Apolinario Villalobos

Kapayakan ng buhay ang kanyang ipinamalas

Sa sabsaban pa lang kung saan siya’y inihimlay ni Maria

Walang trumpetang hinipan upang ihudyat ang pagdating niya

Bagkus, isang nakasisilaw na bituin ang nakita – liwanag ng pag-asa.

Sa murang gulang ay nagpakita ng katalinuhan

Sa templo kung saan siya’y di nagpatalo sa mga Pariseyo

Maraming namangha’t nagulat sa ipinamalas na angking talino

Ang hindi nila alam, siya’y anak ng Diyos, Tagapagligtas, isang Sugo.

Buong pagpakumbabang nagpabasbas kay Juan

Santong itinuring, isinugo rin upang tumulong sa paghanda

Paghanda na kay Kristo ay nakalaan sa pagtubos ng sangkatauhan -

Na ayon sa Bibliya… pagtubos mula sa batik at bigat ng unang kasalanan.

Sakay ng buriko, hindi kamelyo, kabayo o karwahe

Sinalubong ng isinigaw na pagbati at wagayway ng palmera

Ganyan kababaang loob ang sa sambayanan ay kanyang ipinakita

Kahit na turing sa kanya ay magiting na manunubos kaya dinadakila!

Payak na hapunang tinapay, tubig, matamis na alak

Pinagsaluhan upang ipahiwatig, sa mundo’y natirang sandali

Naghugas din ng paa ng mga disipulo niya, pati kanilang mga binti

Pinakadakilang pagpakumbaba ni Kristo, na dapat gayahin nating gawi!

Sa Getsemani kung saan siya ay pinawisan ng dugo

Nakipag-usap siya sa Amang nagbigay ng mabigat na pasanin

Dito, sa tatlumpong pilak siya’y isinuplong ni Hudas na disipulo rin

Pagpapakita na minsan, nabubulag ang kaibigan ng masamang hangarin!

Hindi inalintana ang baku-bako at mabatong landas

Ilang beses na nagkandaluhod, bumagsak, mukha ay duguan

Nilibak at kinutya, hinagupit ng latigo, at walang sawang dinuraan

Subali’t di niya inalintana, dahil buong pusong tinanggap ang kamatayan!

At sa ibabaw ng Kalbaryo’y nasaksihan ang pagtubos

Isang magiting na pagtupad ng mabigat at banal na misyon

Ng isang Hesukristo, na ang pagkilala’y walang hinihinging panahon…

Ng isang Hesukristo, takbuhan at hinihingan ng tulong hanggang ngayon!

MAGBAGO NA TAYO…ALANG-ALANG KAY HESUKRISTO!!!!