Only in the Philippines-

“Surprise inspection” na ina-announce, atbp…

Ni Apolinario Villalobos

Sa Pilipinas lang talaga nangyayari, na ang isinasagawang “surprise inspection” ng isang ahensiya ay ina-announce one day before at nag-iimbita pa ng media representatives. Dahil may mga kamera at mga reporter, siyempre ang mga namumuno ng ahensiya ay nandoon maski ang gagawin lamang ay tatayo at magpapa-interview para magkaroon ng mileage sa exposure, sayang din nga naman kung may balak tumakbo sa eleksiyon.

Sa kaso ng mga bus na palaging nirereklamo dahil sa mga disgrasya, bakit hindi alamin ang mga schedule ng mga ito upang bago magsi-alisan sa terminal ay ma-inspection na ng talagang inspector kahit madaling araw?  Kahit madaling araw pa lang, dapat gawin ang inspection habang nakaparada ang mga bus, hindi yong itataon nila sa pagputok ng araw kung kaylan ay marami nang mga mananakay ang nakasakay na o nakapila. Hindi na kailangang magpakita pa ang mga naka-barong tagalog na mga boss dahil masakit sila sa paningin at nagdudulot lang ng pagkainis sa mga Pilipinong akala nila tanga. Namumura tuloy sila nang hindi nila alam.

Sa kaso naman ng inspection sa mga palengke lalo na kung may mga reklamo tungkol sa presyo ng mga bilihin at mga botcha o double dead na karne, bakit hindi madaling araw gawin ang inspection at wala rin dapat mga boss kundi talagang mga inspector lamang? Tulad ng unang nabanggit, magpapa-istaring lang naman ang mga walang binatbat ng mag opisyal na ito sa harap ng kamera, lalo na at palapit na ang eleksiyon! Ang napakasakit sa paningin ay ang ugali ng mga opisyal, kasama na ang presidente at ang kalihim ng DSWD na kunwari ay nag-aabot ng relief good sa mga evacuees habang abot-tenga ang ngiti na nakatingin sa kamera!

At ang ultimate na bolahan ay ang mga binibitawang salita ng mga kalihim ng ahensiya at ibang opisyal na “inutos ng pangulo na….”. Ibig yata nilang sabihin ay hindi na sila kikilos kung hindi iuutos ng pangulo. Wala ba silang sinusunod na simpleng operating manual? Wala ba silang sinusunod na mga nakasulat na mandato  bilang responsibilidad ng mga ahensiya nila? Sa ganoong sinasabi nila ay pinapakita nila ang kanilang pagiging sipsip at kawalan ng kaalaman sa trabahong itinalaga sa kanila!

Nag-boomerang ang ugaling sipsip ng mga opisyal sa kaso ng Mamasapano massacre. Lahat sila ngayon ay tamimi o tahimik at ayaw magbanggit ng pangalan ng pangulo bilang bahagi ng “chain of command” ng PNP, o bilang pinakamataas na opisyal ng bansa na siyang maaaring magbigay ng mabigat na desisyon. Ngayon nila subukang magsabi ng “inutos ng pangulo na….”, kung hindi “magkakagulungan” ng ulo!