Ang Pagkapalaban

Ng Mga Tiwaling Pilipino

Ni Apolinario Villalobos

Maganda sanang pakinggan na ang Pilipino ay palaban

Subali’t nabahiran ito ngayon ng hindi kaaya-ayang kulay

Kaya ang pantukoy na sana ay nakakapagbigay inspirasyon

Kahihiyan, dulot sa bansang sa pagkalugmok ay nagbangon.

Palaban ang mga pulitiko at mambabatas, sila’y nagpipilit

Ayaw aminin ang pagkasangkot sa anomalya, kahit naiipit

Anuman ang tanggi nila na sila ay mga inosente at malinis

Maliwanag pa sa sikat ng araw, pagkadawit nila kay Napoles.

Sa pagkapalaban ng mga tiwaling Pilipino, hindi nakakatuwa

Kahi’t idinaan ng isa, mga hinaing sa pamamagitan ng kanta

Puro talumpati, tanggi dito, tanggi doon, sila daw ay inosente

Bakit? sila lang daw ba? Aba’y kaladkarin din ang iba sa korte!

Palaban sila na nasemento sa kapal ng kahihiyan ang mukha

Palaban sila na nagkukubli sa kahinaan ng sistema at hustisya

Palaban sila na sa harap ng TV camera ay abot-tenga ang ngiti

Palaban sila na walang konsiyensya at wala man lang pagsisisi!