Bakit nga ba…..?

Ni Apolinario Villalobos

Bakit nga ba…

May mga taong ayaw magsikap

Umaasa sa ibang nagpapakahirap

Hangad ay lagi silang ambunan

Ng karampot na kinitang yaman?

Bakit nga ba…

May mga taong mapanghamak

Walang pili kung sa iba’y manlibak

‘Di man lang naisip ng mga taong ito

Hindi lang sila ang nilalang sa mundo?

Bakit nga ba…

May mga taong kasakima’y matindi

Karapatan ng iba’y kanilang binabali

Pagkagahaman ay walang hangganan

Akala, silang hari, ang iba’y tau-tauhan?

Bakit nga ba…

May mga taong mahilig magmarunong

Bilib sa mga ideyang kanilang isinusulong

Maski palpak, ayaw makinig ng mga payo

Kaya daw pasaning mag-isa ang gobyerno?

Bakit nga ba…

May mga taong simbahan, naligaw na yata

Dahil lihis ang ginagawa, mula sa mga panata

Kaya sa halip na marami ang kanilang maakay

Hindi hamak na mas marami ang nagbaba-bye?

Bakit nga ba…

May mga taong ayaw na talagang magbago

Kahi’t alam na gawi nila’y lihis sa turo ni Kristo

At sa halip na tanggapin, isa pang pagkakataon

Piniling sa kasalanan ay tuloy ang  pagkagumon?

Bakit nga ba…?