Mga Tanikala ng Buhay

Ni Apolinario Villalobos

Pinagdugtong na binilog na bakal, kawing-kawing -

Sa tao ay gumagapos

Hindi lang mga kamay

Pati na rin mga paa niya

Kaya paghakba’y di magawa.

Sa pagsilang pa lang ng iba sa sabsaban ng kahirapan –

Palad nila ay ginuhitan

Na tila may pagbabadya

Kung anong madadatnan

Batay sa kanyang kapalaran.

Mga tanikala ng buhay, iba’t ibang anyo, lahat mabigat

Mayroong kamangmangan

Mayroon namang pang-iisa

Mayroon pa ring panlalansi –

Ng kababayang hindi nagsisisi.

Mga tanikala, hanggang kaylan kakayanin ang bigat?

-ang higpit na nakakasugat?

-ang higpit na nakakasakal?

Ilang hakbang pa ang makakaya?

Upang marating ni Juan ang liwanag ng pag-asa!