Ang Mga Single Moms

Ni Apolinario Villalobos

Maraming single moms na ang aking nakilala

Mayroong tin-edyer, nanganak at inabandona

Mayroong maganda, maaga namang nabiyuda

Mayroong mabait at masipag, ngunit separada.

Mayroong mga naging biktima ng pagkakataon

Mayroong nadala lang ng makabagong panahon

Mayroong gusto lang, anak, sila ay magkaroon

Mayroong nag-akala, itinakwil sila ng Panginoon.

May nakilala ako, halos dapaan ang paglalabada

May isa ring dapit-hapon pa lang ay rumarampa

May iba ring nakilala ko, mga tambay sa Avenida

May iba namang inuumaga sa pagraket sa Ermita.

Ang buhay nilang lahat ay malungkot at  makulay

Ang buhay nilang lahat ay puno ng sakit at lumbay

Ang buhay nilang lahat, sa dusa’y ayaw humiwalay

Ang buhay nilang lahat, pag-asa pa rin ang hinihintay.

Nakakabilib,  paanong lampasan nila ang pagsubok

Nakakabilib, paano nilang indahin masakit na suntok

Nakakabilib, paano nilang tiisin, masasakit na dagok

Nakakabilib, dahil sa mga sakit, hindi sila nalulugmok.

Bukod tangi silang mga nilalang sa ibabaw ng mundo

Batbat man ng dusa’y buo pa rin, kanilang pagkatao

Bihira sa kanila ang hindi nanlupaypay dahil sa siphayo

Hindi tulad ng iba, napitik lang, isip ay hindi na matino.