Daluyong sa Buhay ni Luz...para kay Luz Garnica

Posted on Thursday, 24 July 2014

Daluyong sa Buhay ni Luz

(para kay Luz Garnica)

Ni Apolinario Villalobos

Hindi lang miminsang

Katatagan niya ay halos igupo ng kawalan ng pag-asa

Subali’t gintong pangarap ay naging suhay

Upang siya ay hindi matumba.

Mula nang masilayan

Ng kanyang mga mata ang hagupit at parusa

Ng daluyong ng buhay sa kanyang pamilya

Siya’y di natinag kahi’t man lang bahagya.

Sa musmos na kaisipan

Natanim ang pangako na darating ang panahon

Sa mundong ito siya ay di na maghihirap

Kaya’t bawat hakbang niya’y may katumbas na pagsisikap.

Sa paglakad ng panahon

Pagtagaktak ng pawis, pagkulo ng sikmurang walang laman

Paglakad tungo sa trabaho upang makatipid man lang -

Mga pagsisikap niyang nagbunga at di nga nasayang.

Kanyang napatunayan

Na sa mundong ating ginagalawan gabi at araw

Lahat ng pagsubok ay kaya nating paglabanan

Na tayo’y di dapat mawalan ng pag-asa para sa kinabukasan.

Kanyang naipakita sa kapwa

Na kahirapan ay di dapat libakin at ikahiya

Bagkus ay ituring itong daluyong ng buhay

Na dapat harapin kapalit man ay hirap na walang kapantay.